Aizawl; 4th June, 2026: Vawiin khan Sports & Youth Services Department changtu Minister Pu Lalnghinglova Hmar chuan Mizoram Infiamna kawnga hmasawnna a awm theih nan leh vengchhung hrang hrangah Infiamna pawimawhna hriattir nan, " Empowering Mizoram Sports (EMS) Awareness Campaign " chu Aizawl Municipal Corporator leh Local Council te Administrative Training Institute (ATI) Auditorium, MINECO-ah a hmanpui.

Minister chuan vawiin  an hun hman chu Mizoramin Sports lama hma a sawn theihna tura ni chhinchiahthlak tak a nih thu a sawi a. Vengchhung hruaitute hnenah chuan Mizoram Bana Kaih scheme 2024 hnuaia EMS kalpui dan chu khawtlang hruaituten an hriatthiam a, hma an lak pui chuan Mizoramin Sports-ah hma  nasa taka a sawn belh theih thu a sawi. Minister chuan National Games-ah Mizoram dinhmun chu duhthu a sam tawkloh thu leh International level-ah, a  bik takin Olympic thlirin India ram  dinhmun pawh a hniam hle a. Chutihrualin, Mizo zingah Sports-a tui tak tak tam hle mahse, India level-ah an la thlen san loh  avangin ko  thlak nan EMS chu din a nih thu a sawi.

Minister chuan EMS hnuaiah hian Sports discipline thlan bik neiin hmalak mek a ni a, heng discipline thlante hi Olympic 2036 hmathlira ruahman a ni, a ti. EMS hnuaiah hian naupang kum 8-15 inkar theihna neite zawnchhuaha, tel tir tum a ni. Minister chuan," Jeremy Lalrinnunga’n tun dinhmuna a thlenna ang hi Mizoa naupang dangteah hmuh leh kan duh a ni", a ti. Minister chuan Inspire Institute of Sport (IIS) nen thawhhona thuthlung siam a ni dawn tih a sawi bawk. Vawiina lo kal Vengchhung hruaitute an venga naupangte theihna leh thiamna Sports lamah chherchhuaktu ni turin a chah bawk a ni.

Minister chuan Aizawl Municipal Corporator-te leh Local Council hruaitute telloin an thawh theih loh thu sawiin, mahni vengchhung ṭheuhah tan la tur leh theihtawp chhuah turin a chah a, "Corporators leh local council-te telloin kan che thei lo. Olympic 2036, India rama thleng tura ruahmanah Mizo Infiammi 1 tal an luh ve kan duh a ni" tiin,  vawiina kalkhawmte chu naupangte theihna hai chhuaktu leh chherchhuaktu ni turin a chah a ni. 

Empowering Mizoram Sports chungchang:

Mizoram sawrkar chuan Mizorama infiammite theihna chu hriain, kum 2036-a Olympic lo awm tur thlirin 'The Mizoram Bana Kaih (Handholding) Policy 2024' hnuaiah 'Empowering Mizoram Sports (EMS)' chu a duang a. He hmalakna hi Olympic 2036 bakah khawvel pum huap inelna hrang hrangah Mizoram-in India ram aiawh tur infiammi tam thei ang ber a chher chhuah theihna tura hmalakna a ni. 

EMS thiltum bulpui:

1. Mizoram khaw hrang hranga kum 8-15 inkar infiamnaa theihna bik neite zawn chhuah.

2. Chung mite chu intihsiakna hrang hrang leh development camp hmanga thlitfim.

3. Hma an sawn zel dan tur felfai tak duansak a, national leh international level inelna hrang hranga hmachhawn thei tura buatsaih

4. Kum 2036 Olympic-a India aiawha tel thei tur khawpa Mizo thalai eng emaw zat chher chhuah.

Sports Discipline thlan bikte (Categories):

EMS chungchang hrechiang duh leh hming ziaklut (register) duh tan Helpline Number 8132098626-ah emaw, website ems.mizoram.gov.in-ah hian biak pawh reng theih a ni. 

Mizoram State Sport Council (MSSC) buatsaih programme hi MSSC Secretary Pu Henry C. Lalrawnkima chuan kaihruaiin, Angel Business Promoters of Mizoram aṭangin Pu Mark Lalduhsaka'n Mizoramah Infiamna kawnga hmasawn theih dan tur te, EMS thiltum leh hmathlir kalkhawmte hnenah sawiin, report a pe a. He programme-ah hian Aizawl Municipal Corporators-te, Local Councils hruaitute leh Sports discipline hrang hranga Association hruaitute an tel kim hle. Pu Henry C. Lalrawnkima'n lawmthu sawiin he hun hi a khar a ni.

Attachment

Written by: Gospel Vanlalpani Vandir, MIS, IPRO