Aizawl dated 22nd March 2025: Nizan khan Broadcasting Infrastructure & Network Development (BIND) leh Mizoram Indigenous Games Association tangkawp buatsaih 'DD Mizoram Indigenous Games 2024-25' kharna hun chu Pu Lalnghinglova Hmar, Minister, Sports & Youth Services Department chuan Chaltlang Field-ah a hmanpui a. He hun hi C.Lalremsiama, Secretary, MIG & Programme Executive, DDK, Aizawlin a kaihruai a ni.

Sports & Youth Services Department Minister Pu Lalnghinglova Hmar chuan Mizoram pum huap a mizo infiamna hmanga inelna hautak tak buatsaihtu DDK, Aizawl leh MIGA hmalakna chu fakawm a tih thu sawiin mizo hnam ziarang vawn nun leh thehlar kawnga hmalakna tangkai tak a nih thu a sawi a. He hmalakna avang hian mizo thangthar tam takin mizo infiamna an hmelhriat phahin an ngaih hlut phah ngei a beisei thu a sawi a. Infiamna a telte leh a buatsaihtute duhsakna a hlan bawk a ni.

Broadcasting Infrastructure & Network Development (BIND) leh Mizoram Indigenous Games Association tangkawp buatsaih 'DD Mizoram Indigenous Games 2024-25 hi February ni 20, 2024 khan Serchhipah inelna hi kalpui tan niin District tinah buatsaih a ni a. Inelna neih chhung hian YMA branch 131 atangin infiammi 2290 an tel a ni. Indigenous games ah hian mipa tan insaihruipawh, insuknawr, inarpathai leh inbuan te awmin hmeichhe tan inkawibah a tel bawk a ni. Inkawibahah lawmman pakhatna hi Dampui, Mamit District in an la a, palian insuknawr pakhatna hi Zoramthara, Champhai district a ni a, palaihawl insuknawrah ST Lalramchhana, Lawngtlaiin pakhatna lain pate insuknawrah Lalthapuia, Aizawl chu pakhatna a ni bawk a ni. Palian inbuan a pakhatna chu Lalsangliana, Aizawl district a ni a, palaihawl inbuan ah Lalrinzuala, Kolasib chu pakhat niin pate inbuan ah Melvin Zothankima, Aizawl chu pakhatna a ni. Palian Insaihruipawh a pakhatna chu Lalruatfela, Mission Vengthlang a ni a, palaihawl insaihruipawh a pakhatna chu TBC Lalmuanzuala, Khawzawl niin pate insaihruipawh a pakhatna chu Roland Lalnunsanga, Saitual a ni a. Inarpathai lawmman pakhatna hi Chaltlang in an la bawk a ni. Lawmman pakhatna hian sum fai cheng singnga, pahnihnain cheng singthum leh pathumna hian cheng singkhat sangnga a keng tel a, District Champion hi Aizawl district niin medal 16 an la a, pahnihna hi Saitual district niin pathumna hi Kolasib district an ni.