Aizawl, the 18th June 2022 : Nimin tlai khan Sports & Youth Services enkawltu Minister Pu Robert Romawia Royte hovin Sports & Youth Services Department chuan an Department Office MINECO a an Conference Room ah Khelo India Youth Games, June ni 4 leh June ni 13 inkara Haryana khawpui Panchkula a neiha, thalai infiammite medal la leh tel pualin chawimawina hun ‘Felicitation Programme’ hman a ni.

Minister Pu Robert Romawia Royte chuan Covid hripui lengin Khelo India Youth Games inbuatsaihna a tibuai chung pawhin Mizoram aiawh a tel ten Medal 4 an hawn chu lawmawm a tih thu sawiin Khelo India Youth Games a tel thei nih ringawt pawh inchhuanna tham a ni a, heta tel hi thil awlai lo tak a ni a, duh duh in a tel ringawt theih lova, a tel thei turin qualify thlap a ngai a, chuvangin infiammi 59 lai in tel thei hi inchhuanawm takzet a ni, a ti a. Khelo India Youth Games a medal la te chu Sports Incentive hnuaia Gold Medal la te cheng nuai 1 theuh (Football a Gold Medal mimal tin huamin), Silver Medal la cheng 70,000 leh Bronze Medal la cheng 50,000 pek an nih dawn thu Minister hian a puang a. Hei bakah Medal la event a coach te pawh National Incentive Scheme in a phal angin lawmman sumfai pek an ni dawn tih a sawi bawk.

Sawrkar in school level atanga sports hmasawnna tur a ngaihpawimawh avangin National School Games chungchang, School Education a awm thin chu Sports & Youth Services kutah Allocation of Business Rules siam thain an dah thu a sawi. National School Games chu a aia sang zawk inelnaa in hlankaina a ni a, chuvangin ngaihthah chi a ni lova, a tul angin sum te ngaihtuahin National School Games inbuatsaihna tur hi tih changtlun zel kan tum a ni, a ti. Hemi atan ruahmanna pawimawh tak mai pakhat hi Sports School pathum a ni a. Hetiang school hi Mamit, Zobawk Lunglei leh Lawngtlai ah te cheng nuai 3400 theuh sengin sak mek a ni a, nakum lamah tan beisei a ni a, heta tangin tournament leh competition a tel thei tur thalai infiammi kan chherchhuak dawn a ni, a ti. Sports ruhrel lamah infiammi te mamawh kan la phuhru lo nasa hle a, mamawhna atanga chhutin indaihlohna gap a la zau a, sports ruhrel hi Sawrkarin a ngaipawimawh a, hma lak zel kan tum a ni, a ti. Aizawl ah football khelmual indaihlohna phuhru turin Aizawl Smart City hnuaiah khelmual 7 AIFF pawm ang thlap siam turin tender chhuah mek a nih thu Minister hian a sawi lang bawk a ni.

Hun hmanpuitu dang Pu TC Pachhunga, ex-MLA, Vice Chairman, Sports and Tourism Development Board pawhin thu sawiin infiammite hi a fuih a. He hunah hian Pu Zothantluanga MLA leh Pu V.L. Zaithanzama, MLA te bakah Sports Association hrang hrang hruaitute an tel a ni.

Programme hi Dr. Lalrozama, IAS, Secretary, Sports & Youth Services chuan kaihruaiin Pu Vanlalrova, Chief De Mission nia Mizoram Team hruaitu leh Deputy Director, Sports & Youth Services hnen atangin report ngaihthlak a ni. Infiammi tel zawng zawng te hnenah thilpek hlan a ni.

Khelo India Youth Games ah hian Mizoram atangin thalai infiammi 59 te chu sports discipline 10 ah telin, Medal 4 (Gold - 2; Silver - 1 leh Bronze – 1) an la a. Mizoram Football Boys Team in Kerala Team 5 - 1 in final match ah hnehin Football champion niin Gold Medal an la a. Table Tennis ah  Jeho Himnakulhpuingheta’n Gold  Medal a la a. Boxing (Girls) 63 Kg Category ah Rudy Lalhmingmuani in Silver Medal a lak bakah Weightlifting (Boys) 67 kg Category ah Silvan Beihrothatlo in Bronze Medal a la bawk a. State leh UT 36 tel zinga Mizoram Medal Tally dinhmun chu 23-na a ni.

Discipline hrang hrang a infiammi tel te chu a hnuai ami ang hi a ni:-

Khelo India Youth Games hi duh duh tel mai theih a ni lo a, thalai te tana inelna anih angin School/College a zirlai kum 17 leh kum 21 hnuailam te chauh an tel thei a.  Team game ah tel phak turin India Ranking ah 8-na nih phak a ngai a. Mimal telna ang chi individual event-ah tel thei turin India ramah 8-na an nih phak loh pawhin a kum hmasa lama trial ah te an tel ve a ngai a, trial a an tlin chuan Khelo India Youth Games ah an tel thei chauh a ni. India ram state participate tlem deuh te wild card pek ve thin an ni a, chungah pawh chuan wild card hmu tur chuan National level ah te Medal lo lak ve nual a ngai a ni.

Attachment

Written by: Pratap Chhetri, MIS, Deputy Director