Aizawl, the 26^th of September, 2025: Nimin khan Pu Lalnghinglova Hmar, Minister of State, Sports & Youth Services Department hovin a office-ah Ministry of Youth Affairs and Sports hnuaia MyBharat portal leh, thalai kaihhnawih portal danga thalai tam zawk ziahluh dan tur chungchang sawiho a ni.

Youth Services Minister Pu Lalnghinglova Hmar chuan sawrkar laipuiin portal kaltlangin thalaite tana scheme pawimawh leh tangkai tak tak a puanzar thin thu a tarlang a. MyBharat chauh ni lo, thalai kaihhnawih hmalakna hrang hrangah kan tel ve zel a tul a, Mizo thalaite an inziahluh tam tawk loh avangin heng portal kaltlanga hamthatna awm thei te an chân phah thin tih a sawi. “Tunlai khawvelah chuan kan hnathawh leh hmalakna tamtak hi ‘data’ hmanga teh kan ni tawh a. Field level-a kan hnathawhte a tarlanna tur portal-ah kan report loh chuan thawk tha lo angin kan lan phah thei” tiin, sawrkar hmalakna hrang hrangte a report na tur dika report a pawimawh thu a tarlang a ni.

S&YS Department hnuaia thalai kaihhnawih khawihtu Neva Yuva Kendra (Mera Yuva Bharat), National Service Scheme leh National Cadet Corps aiawhte’n Bharat Portal-a registration drive an kalpui dan leh, mi tam zawk an in register theihna’na rawtna an neihte an tarlang. MyBharat portal registration drive hi kumhnih vel kalpui tawh niin, khaw hrang hrangah YMA leh YLA te nen thawkhoa thalai kokhawmin a hmuna registration tih (on-the-spot registration) kalpui thin a nih thu tarlan a ni a. Zirna in, a bikin NSS unit awmna college leh school ah te mass registration drive kalpui mek a ni bawk. Registration beihpui hi October ni 15 thleng tur niin, tun dinhmunah Mizoram atangin mi 40,000 vel an in register tawh a ni.

Ministry of Youth Affairs & Sports in India hmasawnna lamtluanga thalaite tel ve na tur platform a buatsaih ‘Viksit Bharat Young Leaders Dialogue’ a intihsiakna pakhat Quiz competition chu MyBharat portal atanga in register tur niin, Mizoram atangin mi 3498 an in register tawh a ni.

He meeting ah hian NCC leh NSS a tel thar turte chu MyBharat portal-a in register ngei tur tih nise tiin a rel a. Zau zawka zirna ina hma lak a nih theihna’n Higher & Technical Education leh School Education department-ah te MyBharat portal chungchang hrilhfiahna leh, zirlai zingah registration drive kalpui tura ngenna siam nise tiin rel a ni bawk.

MyBharat portal-ah hian thalai kum 15 - 29 a in register theih a. College/university, NGO, youth club, MSME leh business dangte pawh ‘Partner’ anga in register theih a ni. Portal kaltlang hian sawrkar scheme leh programme hrang hrang, internship leh fellowship tih theihna te puanzar thin niin, portal kaltlang vek hian dilna pawh thehluh thin a ni. Training leh certificate course hrang hrang, career guidance thlengin portal-ah hian a awm a, hei hian zirna leh hna zawnnaah thalaite nasa takin a pui thei a ni. Portal a inziaklut ve thalai dangte bakah pawl leh sawrkar agency te nen inpawhtawnna leh thawhhona a siam theih a, thalai kaihhnawih event hrang hrang - festival, adventure camp, awareness campaign etc. te phochhuah thin a ni bawk. Sawrkar hmalakna thenkhat - entirnan, entrepreneurship scheme leh leadership programme - ah te portal-a in register te duhsak theihna a awm bawk a ni.

He meeting-ah hian Pu V. Lalsangliana, Secretary, Sports & Youth Services Department hovin SYS hotute bakah Higher & Technical Education, School Education leh ICT Department aiawhte an tel a ni.

Attachment