Dated Aizawl, the 28th August 2026: Vawiin chawhma khan Sports & Youth Services (SYS) Minister Pu Lalnghinglova Hmar chuan National Sports Day 2026 lawmna hun chu Sports Authority of India (SAI) Training Centre, Mission Vengthlangah Khuallian niin a hmanpui.
Khuallian chuan National Sports Day chu Mizoram infiammite hma lam pan tura tan an lak thar ni ni se a duh thu a sawi a. Hun inher mil zela inzir thar zel tur leh theihtawp chhuah turin infiammite a fuih a. Minister chuan National Games-ah leh India ram pum huap inelnaah te Mizoram a hnu dala kan tang fo mai chu a ngaimawh thu a sawi a. Sawrkar pawhin theihtawp a chhuah mek zel thu sawiin, infrastructure tha kan mamawh rualin kan neih ang chhun chhun te hman tangkai a tul thu a sawi bawk a. State dangte hnunga tawi reng lova mite ruala hma sawn tum tur leh hmasawnna tura rawtna an neih apiangte hotute hnena thlen zel turin infiammite a sawm bawk a ni.
Inkhawm hi SYS Director Pu Henry C. Lalrawnkima’n a kaihruai a. SYS Deputy Director(G) Pu C. Lalmalsawma’n technical report a pe a. STC Centre-in-Charge Pi Elizabeth Lalnunmawii Colney kaihhruaiin kalkhawmte hian an taksa leh rilru hriselna ngai pawimawh tur leh infiamna chawi sang a, an chhungte leh an thiante pawh infiamna lama tui tura fuih turin thu an tiam rual a ni.
National Sports Day lawm nan Sports & Youth Services office hrang hranga thawkte - Secretariat, Directorate leh MSSC, KISCE, NCC, NSS, SAI leh infiammite chu Group paliah inthenin infiamna chi hrang hrang: Futsal (Men), Volleyball (Women), Arpa Insual (Men), Inkawibah (Women), Dodge Ball leh Dart Throw hmangtein an intihsiak a ni.
Intihsiakna neih a nih zawhah Sports Day kharna inkhawm chawhnu lamah neih a ni a. SYS Joint Secretary Pi Lalsangpuii Hmar Khuallian niin, SYS Deputy Director (A) Pi Jennifer Chongthu-in inkhawm hi a kaihruai a. Lawmman semna hun hman a ni bawk.
National Sports Day hi India infiammi ropui Major Dhyand Chand-a piancham August ni 29-ah kum 2012 atang khan kum tin hman a ni a. Mizoramah pawh a lawmna pui ber SAI Training Centre-a neih a nih bakah District tinah lawm a ni bawk.
Video link Click here
Photo drive Click here
Attachment
