Kokrajhar, Assam the 30^th of July, 2024: Vawiin chawhnu khan Pu Lalnghinglova Hmar, Minister of State, Sports & Youth Services Department, Government of Mizoram chuan SAI Stadium, Kokrajhar, Assam-ah Durant Cup 2024, Kokrajhar Chapter chu Khuallian niin a hawng a. Kokrajhar-a Durand Cup hawnna-ah hian Bodoland FC leh ISL Club North East United FC te an intum a ni. 

Sports Minister Pu Lalnghinglova Hmar chuan politician ang ni lovin, infiamna leh football ngainatu angin Kokrajhar mipuite hmaah a ding tih a sawi a. Hneh taka Durand Cup thlengtu Government of Bodoland Territorial Region leh Indian Army-te bak ah, Assam Football Association leh Assam Sawrkar chung ah lawmthu sawiin, “Hun engemaw chen rambuai ni thin ah, boruak ralmuang tak hnuai a Indian Army buatsaih tournament kan khel tur hian infiamna thil tihtheih zia a tilang a ni”, a ti. Football hmasawnna’na theihtawp chhuahtu Bodoland hotute leh mipuite chu chhuanawm a tih thu a sawi. 

North East Football Development Council-a President ni bawk Pu Lalnghinglova Hmar chuan, state lian lo leh mihring pawh tlemna Mizoram atangin ISL leh I-League ah player thahnem tak an awm reng thusawiin, FIFA World Cup qualifier khelh zawh tak ah pawh India squad-a player 22 zing a 4 chu Mizo an nih thu a tarlang a. Bodoland-ah pawh Indian football level sang ber thleng thei tur theihna tha tak tak nei an awm tih sawiin, Bodoland leh Assam Football hmasawnna’n Mizoram in tih theih a neih chuan a inhawng reng a ni, a ti. 

Vawiin a Durand Cup, Kokrajhar chapter hawnnaah hian Pu Pramod Boro, Chief Executive Member, Bodoland Territorial Region pawhin thu a sawi a. Assam leh Bodoland ziarang tarlang thei zai, lam leh thil dang hmuhnawm tak tak entir niin Indian Army-te’n ennawm an entir an bawk a ni.

Indian football calendar khuhhawnna Durand Cup hi kum 1888 a khelh tan niin kumin hi a vawi 1330-na tur a ni a, Asia khawmualpui a football tournament upa ber a ni. Khawvel huap pawhin English FA Cup leh Scottish FA Cup te nen football tournament upa pathum zing ah a tel pha a ni. 

Durand Cup 2024 ah hian Indian Super League, I-League, Indian Services, Central Armed Police Force bak ah foreign team sawm bik te nen team 24 an tel a, Kolkata, Shillong, Jamshedpur leh Kokrajhar-ah te khelh tur a ruahman a ni. Final hi August 31, 2024 ah mipui 68,000 lenna Vivekananda Yuba Bharati Krirangan, Kolkata ah khelh a ni ang. Kumin a Durand Cup match hmasa ber chu July ni 27, 2024 khan Salt Lake Stadium, Kolkata ah champion lai Mohun Bagan SG leh Downtown Heroes FC ten an khel a ni. 

Kokrajhar-ah hian Group E match bakah Quarter final match pakhat khelh tur a ni a. Group E ah hian ISL club pahnih – Odisha FC leh NorthEast United FC te bakah BSF Football Team leh Bodoland FC-te’n quarter final luh an inchuh dawn a ni.

Attachment