Aizawl, the 3^rd August, 2024: Mizo Zirlai Pawl (MZP) leh Aizawl District Basketball Association (ADBBA) te tawngkawp buatsaih Inter-College Basketball Tournament kharna hun, Hawla Indoor Stadium-a neih chu Sports & Youth Services Minister Pu Lalnghinglova Hmar chuan nizan khan khuallian niin a hmanpui.

Khuallian Pu Lalnghinglova Hmar chuan nakin lawka hna la zawng mai tur zirlaite chu zirna kawngah an thiam tawklo a nih pawhin skill training hrang hrangte zir tur leh ruihhlo laka fihlim turtein a fuih a. Sports chu intihhlimna mai nilo eizawn nana hman tlak a nih thu a sawi a. National level mai piah lamah World level-ahte Mizo tam zawk kan lan theih nana tanlak a ngaih thu sawiin, sports lama tuimite chu hmathlir tha tak neia sang tak thlen tum ngei turin a fuih bawk.

He hun hi Pu C. Lalremruata, Vice President, MZP chuan kaihruaiin President Pu H. Lalthianghlima hnen atangin thusawi ngaihthlak a ni.

Inter-College Basketball Tournament hi July ni 29 atanga August ni 2, 2024 chhunga khelh niin College leh University 7 te an tel a. Pachhunga University College (PUC) leh Hrangbana College (HBC) te'n final khelin HBC te an champion a, trophy, certificate leh pawisafai Rs 50,000/- an dawng a, PUC chu pahnihna niin, trophy, certificate leh pawisafai Rs 30,000/- an dawng a, Mizoram University chu pathumna niin, trophy, certificate leh pawisafai Rs 20,000/- an dawng a. Most Valuable Player (MVP) atan H. Lalhmachhuana, HBC chu thlan niin trophy, certificate leh pawisafai Rs 5,000/- a dawng bawk.

Attachment