Lunglei, 2025 Ṭau thla ni 16: Vawiin chawhnu khan Mizoram Sawrkara Sports & Youth Services Minister Pu Lalnghinglova Hmar chuan Lungleia C. Ṭhuamluaia Mualah Lunglei High Powered Committee (HPC) sponsor-a Lunglei District Football Association (LDFA) te'n inter-village football tournament an buatsaih, 14th HPC Cup 2025 hmawr bawkna hun chu khuallian niin a hmanpui.

14th HPC Cup 2025 hmawr bawkna inkhawm tawi buatsaihah khuallian Pu Lalnghinglova Hmar chuan Mizote hian infiamna kan ngaina a, mahse, kan thleng sang lo tih kan pawm ngam a ngaih thu leh India ram inelna sangah pawh kan tel phakna a la tam tawk loh thu sawiin, hei hi ṭan petu leh tum ruhna thar siamtu atan Mizo ṭhalaite'n hmang se a duh thu a sawi a. Mizoram sawrkarin infiamnaah awmze neia hmasawnna tur hmathlir a nei tih sawiin, Mizoram Bana Kaih Scheme hnuaiah infiamna tihhmasawnna tur, "Empowering Mizoram Sports" kalpui a nih thu leh "Vision 2036" tiin kum 2036 Olympics-ah Mizo ṭhalai tam zawk an inlan theih nan hmathlir neia hma lak chhoh mek a nih thu a sawi a. India ram kan sanna sport discipline zel chu thlur binga invulh chhoh tum a nih thu sawiin, hemi atan hian Lunglei ṭhalai tam zawk an tel theih nan Lunglei District Sports Committee leh infiam mite theih tawp chhuah turin a sawm a. Sport discipline duat bik tur zingah hockey a tel tih sawiin, Lunglei District-a Hauruang khuaah international standard tling hockey ground siam turin ruahman a nih thu leh bul ṭan theih ṭep a nih thu a sawi a. Infiamnaa hma sawn a, sang tak thleng turin infrastructure, training leh equipment ṭha a pawimawh tih sawiin, hemi kawngah hian sawrkar chuan theih tawpin hma a la zel dawn tih a sawi a. 14th HPC Cup finalist-te chu duhsakna hlanin, LDFA kutah thilpek football lam infiamna hmanrua eng emaw zat a hlan bawk.

14th HPC Cup hmawr bawknaah hian Sports Minister hi a nupui Pi Lalsangzeli bakah, Mizoram Legislative Assembly member-te - Adviser to Chief Minister (Finance) Pu TBC Lalvenchhunga, Adviser to CM (Technical) Pu H. Ginzalala, Adviser to CM (Health & Family Welfare & Agriculture) Dr Lorrain Lalpekliana Chinzah, Lunglei HPC Vice Chairman Pu V. Malsawmtluanga, Palak bialtu MLA Pu K. Hrahmo, Lunglei South bialtu MLA Pu Lalramliana Papuia, Lunglei West bialtu MLA Pu T. Lalhlimpuia leh South Tuipui bialtu MLA Pu Jeje Lalpekhlua te, Lunglei Municipal Council (LMC) Chairman Pu Lalzuithanga leh councillor-te leh sawrkar official eng emaw zatin an ṭawiawm a ni.

He hunah hian Lunglei HPC Vice Chairman & HPC Cup Organising Committee Chairman Pu V. Malsawmtluanga chuan 14th HPC Cup hmawr bawkna huna Sports Minister leh MLA rual ṭhahnem tak an tel chu Mizoram sawrkarin Lunglei leh chhim lam mipuite a ngaih pawimawhzia leh ṭhalaite hmakhua atan theih tawp a chhuah zel dawn tih lantirna a nih thu a sawi a. Infiamna chu intihhlimna satliah a nih loh thu leh ei zawnna bakah ruihhlo dona atana hmanraw ṭangkai tak a nih thu sawiin, ram, khawtlang leh kohhran tana mi hman tlak ni turin taksa hriselna leh fitness ṭha neih a pawimawh thu a sawi a.  Infiam mite'n sang tak an thlen theih nan inkhel entu leh ngaihlutute an pawimawh tih sawiin, infiamna kal tlanga ṭhalaite leh ramin hma a sawn zel theih nan mipuite ṭawiawmna a ngen a ni.

He hun hi LDFA President & Organising Committee Working Chairman Pu Pc. Lalramnghaka'n kaihruaiin, Salvation Army Lunglei Bial Commanding Officer Capt. R. Zosangliana'n hunserh a hmang a. Organising Committee Secretary Pu Rongaia Ralte chuan tournament report pein, Mizoram Football Association (MFA) hruaitute aṭangin thu sawi ngaihthlak a ni bawk a. HPC Vice Chairman Team leh Sports Minister Team te'n exhibition match khelin, he'ng team-ah hian ram hruaitu (MLA)-te leh hranghlui inkhel thiam rualte an tel a. MLA Pu Jeje Lalpekhlua goal thun hmangin Sports Minister Team hian 1-0-in hnehna an chang a ni.

14th HPC Cup 2025-ah hian inelna huang (category) hnih - Men's team leh Veteran (40+) team inelna buatsaih niin, Veteran-ah 2nd Bn MAP leh Zotlang te'n final an khel a. Hun pangngai leh hun pek belhah 0-0-a an inhneh tawk hnuah penalty shootout hmanga a chak zawk zawn niin, Zotlang lam hi 4-2-a chakin an champion a. Men's-ah Zohnuai LC leh Zobawk South LC te'n final hmuhnawm tak khelin, Zobawk South LC team-te hi 3-2-a chakin an champion thung.

Lunglei District-a khaw hrang hrangte football hmanga inelna HPC Cup hi kum 2011 aṭang khan khelh ṭan niin, "The Greatest Show on Leitlangpui" tia hming lem vuah a ni a. Hnahthial VC team chu champion hmasa ber niin, vawi 5 champion tawh Electric Veng VC team chu champion ngun ber an ni a. Men's team bakah, under-17, women leh veteran te a remchan dana telh ṭhin niin, kumin 2025 hian men's leh veteran inelna buatsaih a ni a. Men's hi inter-village competition niin, team 30 an tel a; veteran hi open tournament niin, team 16 an tel thung a. Men's-ah hian final thlengin match 51 khelh niin, goal 262 a lut a. Veteran-ah hian match 31 khelh niin, goal 133 a lut thung a ni.

14th HPC Cup men's champion team hian trophy leh ₹ 1,20,000/- dawngin, runner-up hian ₹ 60,000/- leh certificate an dawng bawk a. Veteran champion team hian trophy leh ₹ 30,000/- dawngin, runner-up hian trophy leh ₹ 15,000/- an dawng thung. He'ng bakah hian team tan fairplay leh participation prize sem niin, mimal lawmman hrang hrang - best goalkeeper, best defender, best midfielder, best forward, top scorer leh best player te siam a ni bawk.


Attachment



Written by: C. Lalhruaitluanga, MIS, Deputy Director