Aizawl, the 21st of May, 2025: Vawiin chawhnu khan Sports & Youth Services Minister Pu Lalnghinglova Hmar chuan MINECO-a a office chamber-ah Khelo India Youth Games 2025 a Boxing a gold medal la Samuel Zadeng leh Football (Boys) a bronze medal la te lawmpuina hun a hmang.
May 4 atanga ni 15 inkara Patna, Bihar a neih, Khelo India Youth Games a medal latute lawmpuinaah hian Minister chuan, "Mizoram in gold medal kan la tih ka hriat khan ka lawm hle a, a chhan chu national level-ah chuan medal lak hi thil harsa tak a ni.
Sports hmasawnna chu sports person-ah a lang tur a ni a, medal lak dan zel an en avangin medal lak hi a pawimawh a ni," a ti.
Minister chuan, "Samuel-a'n gold medal a la hi ka lawm tak zet a. Boxing phei chu state dang atangin khel an tam a, inelna a san avangin national champion nih a har hle," tiin gold medal latu a lawmpui thu a sawi a. "Football-ah hian medal hi kan la tluang pangngai thei viau a, hengahte hian player-te leh coach-te inpekna a fakawm." tiin a sawi bawk.
Bawngkawn Brigade rawlthar Samuel Zadeng s/o ZD Lalremsanga hian kg 65-70 huangah khelin final-ah Uttar Pradesh boxer Praveen Yadav chu 5-0 in a hneh. "State dang kan phak lohna thin height leh reach-te Samuel-a hian a nei a, theihna sang tak nei niin national level chauh ni lovin Asia leh a aia sang pawh thleng zel thei a ni," tiin Minister chuan sang tak thleng tura tun aia nasa a thawkrim turin a chah.
Samuel-a chuan, "Inelna tan tir lamah taksa lamah harsatna nei mah ila ka chak thei zel a. Coach-te leh team official-ten min pui nasa a, tactic leh gameplan tha tak min siamsak zarah tluang takin ka chak zel thei a ni." a ti a. Sports Minister in an medal lakte a lawmpui chu lawmawm a tih thu a sawi bawk.
Gold medal latu Samuel-a hnenah hian boxing infiamna bungrua hlan a ni a, Sports Minister-in ama mimal pawisa a pe bawk. August ni 29-a Incentive Cash Award sem hunah medal late hi sorkar ațanga pawisa fai hlan leh an ni ang.
Sports & Youth Services hotute pawhin thu sawiin Mizoram infiamnaah player țhate sang zawk thlenpui zel turin coach-te pawhin hmasawn tura țan an lak a ngaih thu an sawi a ni.
Khelo India Youth Games 2025 ah hian Mizoram atangin sports discipline pasarihah infiammi 34 leh anmahni hruaitu mi 10 an tel a, state leh UT 36 intihsiak zingah 26 na an ni. Kuminah hian E-Sports chu demonstration sports a telh thar a ni a, Mizoram atang pawhin mi 13 an tel a ni.
Medal late lawmpuina hunah hian Sports & Youth Services Department Secretary Pu V Lalsangliana bakah SYS Department hotute leh Khelo India Youth Games Mizoram team official-te leh coach-te an tel a ni.
Attachment
