2024 Ramtuk thla ni 24: Vawiin khan Mizoram Sawrkara Sports & Youth Services Minister Pu Lalnghinglova Hmar chuan Kolasib District chhunga Kawnpui khua tlawhin, S&YS Department hnuaia Kawnpui Playground No. 2-a phullem phah mek leh Hockey Ground te a tlawh.

Minister hi Kawnpui Sub-Divisional Officer (Civil) Pu Mohammad Aaquib leh Kawnpui khawtlang hruaitute'n an lo dawngsawng a. Inkawm hona hun tawi buatsaihah Minister chuan sawrkar tharah zirna leh hriselna lama insen hmasak tum a nih avangin infiamna hmunhma buatsaih vak vak chu insum rih a ṭul dawn tih sawiin, hemi rual hian infiamna hmunhma awm sa leh hma lakna kal mek chu ṭha leh ṭangkai thei ang bera hman tum a ni dawn, tih a sawi a. Sawrkarin a duh ber chu sports infrastructure awm sate chu infiam mite'n a nih dan tur angin hmang ṭangkai se tih a ni, a ti.

Minister chuan a enkawl department dang - Labour, Employment, Skill Development & Entrepreneurship (LESDE) hnuaiah ṭhalai tam zawkin ei zawnna an neih theihna tur kawng dapin, sawrkar laipui nen indawrna kalpui a ni tawh tih a sawi a. Ṭhalaite hmasawnna tur leh ruihhloin a tihbuai ṭhalaite chhanchhuahna kawngah khawtlang hruaitute chu ngaihtuahna seng a, theih tawpa sawrkar thawhpui turin a sawm a ni.

Minister hian Kawnpui Playground No. 2-a astro turf phullem phah hna thawh mek leh Kawnpui Hockey Ground chu a hmunah kalin a enfiah nghal a ni.

Kawnpui Playground No. 2-a phullem phah hna hi cheng nuai 600 senna tura ruahman niin, a hna pum pui za zela 90 vel zawh tawh a ni a. Phullem phah hna tak chu zawh tawh niin, pavilion leh mipui ṭhutna tur bakah, Ground sir cheibawl hna te chu zawh fel a la ni lo thung a ni.



Attachment


Written by: C. Lalhruaitluanga, MIS, DIPRO - KOLASIB