2024 Ramtuk thla ni 24: Vawiin chawhnu khan Mizoram Sawrkara Sports & Youth Services Minister Pu Lalnghinglova Hmar chuan Kolasib Sports Stadium-ah Kolasib District Football Association (KDFA) First Division League 2023/24 kharna hun chu khuallian niin a hmanpui a. He hunah hian Kolasib District Bawrhsap, KDFA Patron Pu John LT Sanga chu khual zahawm a ni.

KDFA I Division League 2023/24 kharna final match khelh hmaa inkhawm tawi buatsaihah khuallian Pu Lalnghinglova Hmar chuan 'eng hna pawh thawkin, eng kawng pawh zawh i la, kan thil tih tumin hmasawnna lam hawi se' tih chu a thil ngaih pawimawh a nih thu a sawi a. Football chu tun hma chuan infiamna pakhat a ni ṭhin a, a hnuah inelna leh intihhlimna niin, tunah chuan ei zawnna tling tak tak a ni tawh tih sawiin, ei zawnna tlak a nih hriaa tihtak zeta football khel turin ṭhalaite chu a chah a. Ei zawnna atana hmang thei lo tur tan chuan ei zawnna kawng dang dal tur khawp erawh chuan uar loh a ṭha tiin, thiamna (talent)-in a zir a nih erawh chuan theih tawp leh tihtak zeta beih a hlauhawm loh tih a sawi a. Finalist-te chu duhsakna hlanin, KDFA kutah thilpek pawisa fai Rs. 20,000/- a hlan nghal bawk.

He hun hi KDFA President Pu Laltlanmawia chuan kaihruaiin, Match Commissioner Pu Lalhriatpuia'n tournament report a pe a. KDFA hmingin MFA Honorary Secretary Pu Lalnghinglova Hmar chu MLA a tlin leh Minister a nih lawmpuina thuziak an hlan a. KDFA Senior Vice President a nih laia kum 2023 November ni 6-a chatuan ram pan ta, Pu Lalbiakṭhuama Pautu sunna hun hman niin, a chanchin ngaihthlak a nih hnuah a sun nan ngawi rengin minit 1 chhung din a ni a. Hemi hnu hian Saidan GSA leh Ṭumpui FC te chuan final match hmuhnawm tak an khel zui a ni.

KDFA I Division League 2023/24 hi February ni 12, 2024 khan khelh ṭan niin, I Division club 6 te chu vawi khat ṭheuh inkhel kualin, match 15 khelh a ni a. Hemi aṭanga point hmu sang ber pahnih - Saidan GSA (12 points) leh Ṭumpui FC (10 points) te chuan final an khel a ni.

Final match-ah hian hun pangngaia goal awm lova an inhneh tawk hnuah, hun dang pek belh (extra time)-ah Saidan GSA chuan 1-0-a Ṭumpui FC hnehin, KDFA I Division League 2023/24 champion an ni a. Champion team hian trophy leh Rs. 70,000/- an dawng a. Runner-up hian Rs. 10,000/- an dawng bawk.

Tournament chhunga yellow card 1 chauh hmu, Zanlawn GSA chu Fair Play award hlan niin, trophy leh Rs. 5,000/- an dawng a. Mimal lawmman buatsaihah goal 5 khungtu Samuel Lalruatfela, Venglai FC chu top scorer niin; best forward - Vanlaldawna, Saidan GSA; best midfielder - R. Lalthlamuana, Ṭumpui FC; best defender - Ricky Rohmingliana, Ṭumpui FC leh best goalkeeper - Ngaichhunga, Saidan GSA te an ni a. Mimal lawmman hian trophy leh Rs. 500 ṭheuh a keng tel a ni.



Attachment



Written by: C. Lalhruaitluanga, MIS, DIPRO - KOLASIB