No.1090/2021-2022
Aizawl 23rd June 2021: Tokyo Olympics ‘20 July 23 - 8 August 2021 chhunga neih turah Lalremsiami Kolasib nula chu Hockey Squad-ah thlan a ni a, hei hi official-a puanchhuah a ni tawh a ni. Mizoram Sorkar chuan Sports & Youth Services Department kaltlangin Lalremsiami hi Rs. 25,00,000 (cheng nuai sawmhnih panga) a pe dawn a ni.
He thu hi vawiin International Olympic Day hian Sports Minister Pu Robert Romawia Royte chuan a puang a. He Lawmpuina 1st Installment Rs 10,00,000/-(Cheng nuai sawm) chu naktuk June ni 24, 2021 hian Lalremsiami hlawhtlinna puala Thingpui Inhona CM Conference Hall-a neihah Pu Zoramthanga Chief Minister-in Remsiami Nu hnenah a hlan ang a. A bak Rs 15,00,000/-(cheng nuai sawm panga) chu Olympic Games zawh hnuah amah Lalremsiami kutah hlan a ni ang. Olympic Medal a la a nih chuan Sorkarin hamthatna dang pawh State dangte tihdan enin a siam belhsak dawn a ni tih Sports Minister chuan a sawi bawk.
India Camp Bangalore-a awm mek Lalremsiami chuan Mizoram Sorkar chungah telephone-in lawmthu a rawn sawi a, Mizoram Chief Minister Pu Zoramthanga chungah lawmthu sawiin Sports Minister Pu Robert Romawia Royte leh an Bialtu MLA & Minister Pu K.Lalrinliana te, Sports Department hotute, amah lo enkawl thintu Coach te leh Hockey Mizoram te bakah amah lo tana lo thlawp thintu Mizoram mipuite chungah lawmthu a sawi a, theihtawp a chhuah tur thu a sawi bawk.
Mizoram Sorkar chuan Lalremsiami’n Youth Olympics a Silver Medal leh Asian Games a Silver Medal a lak khan Rs. 20,00,000(cheng nuai sawmhnih) chu amah chawimawi nan leh tihphur nan a lo pe tawh a, tunhnaiah a training tanpui nan Mizoram State Sports Council (MSSC) chuan Rs. 50,000(cheng singnga) a lo ruahmansak tawh bawk a ni.
Attachment
Written by: Pratap Chhetri, MIS, IPRODated: 23rd Jun 21 3:18 PM
