Aizawl, 21st April, 2026 : Mizoram State Sports Council (MSSC) kum 50-na Golden Jubilee chu nimin (April ni 20, 2026) khan R. Dengthuama Indoor Stadium, Mualpuiah urhsun taka lawm a ni a. MSSC President, Sports & Youth Services Minister ni bawk chu khuallian niin, Mizoram Chief Minister hlui Pu Lal Thanhawla, MSSC President hlui MLA ni lai mek Pu Robert Romawia Royte, Pu Jeje Lalpekhlua MLA, Lt. Col. Clement Lalhmingthanga MLA, MSSC President hluite Pu Zodintluanga Ralte, Pu Rin Sanga, IAS (Retd) leh Pu Rualchhina bakah sawm bik mi pawimawh tak takte, MSSC hnuaia affiliated State–level Sports Association hrang hrang aiawhte an tel a ni.
Golden Jubilee lawmna Inkhawmah hian khuallian MSSC President Pu Lalnghinglova Hmar chuan kalkawmte chu MSSC Golden Jubilee chibai bukin duhsakna a hlan a, MSSC hruaitu hmasa thahnemngai tak takte thawhrim rah ropui tak vawiinah hian kan tel a ni a ti a, golden jubilee kan lawm rual hian kum 50 lo awm leh tur, centenary hmel kan hmuh hun atana kan hmathlirte hi kan ngai pawimawh dawn a ni a ti a. Mizo zingah infiammi tha tak tak kan nei tawh a, chutih rualin international chu sawi loh national levelah pawh kan hlawhtlinna hi a la beitham hle a, tan kan lak nasat a ngai a, theihtawp chhuah kan tum a, tum mumal tak nen hmalam pana ke pen kan tum a ni a ti. Kalphung tha zawk leh felfai zawk a awm theihna theihtawp an chhuah thu sawiin thurawn pawh an lak theih reng thu a sawi. Mizoram leilungfate zingah Olympian pahnih chauh kan la awm chu tlawmngaihthlak a tih thu sawiin India ramin kum 2036-ah Olympic thlen a tum a, hemi hun a lo thlen hi chuan Mizo thalaite thahnem tak India ram aiawha an tel theihna turin hmathlir mumal tak nen hma an lak mek thu a sawi a, olympic a hlawhtlinna kan hmuh theihna tur ni a an hriat sports discipline 8 thlan bik an neih thu leh theihtawp chhuaha hma an lak thu a sawi bawk a ni.
Mizoram State Sports Council (MSSC) hi April ni 20, 1976 khan Executive Order hmanga din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun a ni. Tun dinhmunah MSSC hnuaiah hian State level Sports Association 34 an inziaklut a, Jubilee pual hian kum khat chhungin Sports Association tin hian Mizoram pum huap tournament pakhat theuh hlawhtling takin an buatsaih tawh nghe nghe a ni.
Mizoram State Sports Council member hmasa ber (1976) te chu:
President : Dr. H. Thansanga, Education Minister
Vice President : Pu Lal Thanhawla
Secretary : Pu Zolura, Special Officer for Scouts & Guides and Youth Welfare Activities
Treasurer : Pu J. Lalduhawma, State Social Education Officer
Members : Pu Hranthanga, Deputy Director, School Education
Pu L. Pachhunga, ADC
Pu SH Pautu, Lecturer, Pachhunga University College
Pu C. Khenglawt, DGP
Pu KL Rochama, MLA
Pu R. Rozika, Addl. Secretary, Finance
The Mizoram State Sports Council Act, 2002 chuan Sports & Youth Services Minister apiang chu ex-officio President atan a ruat a, Secretary leh Finance Secretary hi sawrkarin a ruat a, Vice-President leh Joint Secretary te hi MSSC member zing atangin thlan chhuah an ni.
MSSC Golden Jubilee pual hian April ni 22, 2025 khan khan Golden Jubilee Torch (meichher) Relay neih a ni a, Bawngkawn atanga tanin Sports Association 34 aiawh ten Aizawl khawpui chhungah meichher inpe chhawngin, Sports Minister Pu Lalnghinglova Hmar, MFA President ni bawk chuan Aizawl Tennis Court ah a tlan luh pui a, inkhawm tawite neih zui a ni.
Golden Jubilee lawmna inkhawmah hian MSSC hruaitu hluite leh hruaitu ni mekte chawimawina hlan an ni a, national level chin chunglama Mizoram tana hlawhtlinna changte chawimawina hlan niin, MSSC Award sem nghal a ni bawk.
Golden Jubilee lawmna inkhawmah hian Pu V. Lalsangliana, Commissioner & Secretary, SYS chuan inlawmna thu sawiin, MSSC Secretary Pu Henry Lalrawnkima’n report a pe a, Dr. Lalhmuchhuaka, Vice President, MSSC-in lawmthu sawina in a khar a ni.
MSSC hnuaia Sports Council in affiliate te chu a hnuaiah hian tarlan a ni :
1. Aquatics Association of Mizoram
2. Archery Association of Mizoram
3. Mizoram Arm Wrestling Association
4. Mizoram Athletics Association
5. Mizoram Badminton Association
6. Mizoram Basketball Association
7. Body Building and Fitness Association of Mizoram
8. Mizoram Boxing Association
9. Mizoram Carrom Association
10. Mizoram Chess Association
11. Mizoram Cycling Association
12. Cricket Association of Mizoram
13. Mizoram Fencing Association
14. Mizoram Football Association
15. Hockey Mizoram
16. Mizoram Indigenous Games Association
17. Mizoram Judo Association
18. All Mizoram karate Association
19. Mizoram Kickboxing Association
20. Mizoram Motorsports Association
21. Muay Thai Association of Mizoram
22. Mizoram Powerlifting Association
23. Mizoram Rifle Association
24. Mizoram Sepak Takraw Association
25. Mizoram Snooker & Billiards Association
26. Mizoram Table Tennis Association
27. Mizoram Amateur Taekwondo Association
28. Mizoram Tennis Association
29. Mizoram Tug of War Association
30. Mizoram Volleyball Association
31. Mizoram Weightlifting Association
32. Mizoram Wrestling Association
33. Mizoram Wushu Association
34. Mizoram Paragliding Association
Attachment
